Багшийн самбар

Ангийнхаа сурагчид ямар сорил бодсон, хэдэн хувь авсан, аль бодлогыг хамгийн их алдсаныг нэг хуудаснаас харна. Мөн сайтын бодлогын сангаас бодлого сонгож гэрийн даалгавар, шалгалт өгч, шалгалтын явцыг шууд хянана. Ангидаа цаасаар авсан сорилыг утсаараа уншуулж шууд дүгнэнэ.

1. Хэрхэн эхлэх вэ 2. Ангийн дүн 3. Даалгавар, шалгалт өгөх 4. Шалгалтыг шууд хянах, дүн 5. Сурагч юу харах вэ 6. 📝 Хариултын хуудас уншуулах 7. Түгээмэл асуултууд

1. Хэрхэн эхлэх вэ

Сайтад бүртгүүлнэ

math6000test.mn дээр өөрийн имэйлээр бүртгэл үүсгэнэ. Энгийн хэрэглэгчийн бүртгэл — тусгай зүйл хийх шаардлагагүй.

Багшийн эрх хүснэ

Бүртгүүлсэн имэйл хаягаа бидэн рүү илгээнэ — Фэйсбүүк хуудсаар эсвэл math6000saraa@gmail.com хаягаар. Бид таны бүртгэлд багшийн эрх нээж өгнө.

Багшийн самбар нь бүх багцад багтдаг — ЭЕШ бэлтгэл, Junior, 6000 тест эсвэл Бүх ном. Аль нэг багц таны хувьд идэвхтэй байхад л хангалттай.

Анги нээнэ

Эрх нээгдмэгц math6000test.mn/bagsh.html хуудас руу орно. Нэвтэрсэн байх ёстой.

Талбарт ангийнхаа нэрийг бичнэ — жишээ нь «12а анги», «Бямбагарагийн бүлэг» — тэгээд «Анги нээх» товчийг дарна.

Тэр дор нь 6 тэмдэгттэй нэгдэх код үүснэ:

K7M2QX

Хэдэн ч анги нээж болно. Анги бүр өөрийн кодтой байна.

Сурагчдадаа кодоо өгнө

Сурагч бүр өөрийн бүртгэлээрээ нэвтрээд Миний дүн хуудсанд орж, багшаасаа авсан кодыг оруулна. Тэр даруй таны ангид нэгдэнэ.

Та сурагчдынхаа имэйлийг гараар бичих шаардлагагүй — алдаа гарах эрсдэлгүй гэсэн үг.

Нууцлалын тухай. Сурагч кодыг оруулснаараа үр дүнгээ танд харуулах зөвшөөрлийг өөрөө өгч байгаа юм. Та зөвхөн өөрийн ангид нэгдсэн сурагчдын мэдээллийг харна — өөр багшийн анги, нэгдээгүй сурагчийн дүн танд хэзээ ч харагдахгүй.

2. Ангийн дүн — юу харагдах вэ

Ангийн тойм Хэдэн сурагч бүртгэлтэй, хэд нь бодож эхэлсэн, ангийн дундаж хэд болох, нийт хэдэн сорил ажилласан.

Хамгийн их алддаг сэдвүүд Ангийн хэмжээнд хамгийн бага хувьтай сэдвүүд эрэмбэлэгдэн гарна. Дараагийн хичээлд юуг давтахыг энэ шууд хэлж өгнө.

Сурагч × сорил матриц Ном, бүлгээ сонгоход багана бүр нэг сорил болж харагдана. Нүд бүр тухайн сурагчийн авсан хувь. Цэг байвал бодоогүй гэсэн үг.

	9.1	9.2	9.3	9.4
Болд Б.	95	70	35	·
Сараа С.	100	85	90	95
Тэмүүлэн Т.	·	·	·	·

Ногоон 80%-иас дээш · шар 50–80% · улаан 50%-иас доош · цэг бодоогүй.
Энэ жишээнд Болд 3 дахь сорилд бэрхшээлтэй, Тэмүүлэн хараахан эхлээгүй байгаа нь нэг харцаар мэдэгдэж байна.

Бодлого тус бүрийн анализ Сорилын багана дээр дарна. Тухайн сорилын бодлого бүрээр ангийн хэдэн хувь нь зөв бодсон, хэн алдсан нь нэрээрээ гарна. «14-р бодлогыг 13 хүний 2 нь л зөв бодсон» гэдгийг мэдвэл тэр бодлогыг самбар дээр заавал тайлбарлах нь ойлгомжтой.

Excel татах Хүснэгтийг бүхэлд нь Excel файлаар татна. Гурван хуудастай: сурагч × сорилын дүн, бодлого бүрийн анализ, мөн сурагч бүр бодлого тус бүрд юу хариулсан бүрэн задаргаа. Сургуулийн тайланд шууд ашиглаж болно.

3. Даалгавар, шалгалт өгөх

Сайтын бодлогын сангаас бодлогоо өөрөө сонгоод ангидаа 🏠 гэрийн даалгавар эсвэл 📝 шалгалт болгон өгнө. Бодлогыг хуулж авдаггүй — сурагч нээх үед сайт бодлогыг шинээр үүсгэдэг тул сурагч бүр өөр тоотой бодлого авна. Хажуугийнхаасаа хуулах ашиггүй.

«Даалгавар ба шалгалт өгөх» хэсэгт орно

Багшийн самбарын дээд хэсэгт байгаа 📋 Даалгавар ба шалгалт өгөх товчийг дарна (math6000test.mn/daalgavar-bagsh.html). Ангиа сонгоод «＋ Шинэ даалгавар» дарна.

Хэсэг, ном, бүлэг, сорилоо сонгоно

Сайтын гурван хэсэгтэй ижил ангилалтай. Ангийн нэрээс (12а, 10б, 9в) хэсэг нь автоматаар сонгогдоно, хүсвэл өөрөө сольж болно.

Дунд анги7, 8, 9-р анги · Улсын шалгалтын жишиг · 6000 бодлого Junior

Ахлах анги10, 11-р анги · Математикийн 6000 тест

ЭЕШ бэлтгэл12-р анги · 1000 бодлогын эргэн тойронд · ЭЕШ-ийн сорилууд (2006–2026) · ЭЕШ-ийн сэдэвчилсэн сорилууд · ЭЕШ 35 жишиг сорил 2

Сорил дээр дарахад түүний бодлогууд зөв хариу (ногоон), бодолттойгоо харагдана.

Бодлогоо «сагсанд» нэмнэ

Хэрэгтэй бодлого бүрийн «＋ Нэмэх» товчийг дарна, эсвэл «Бүгдийг нэмэх». Олон ном, бүлгээс хольж сонгож болно — хамгийн ихдээ 60 бодлого. Доод мөрөнд хэдэн бодлого, нийт хэдэн оноо сонгосон нь харагдана.

Сагс таны хөтөчид хадгалагддаг тул хуудсаа хаагаад буцаж орсон ч сонгосон бодлого тань алга болохгүй.

Тохиргоо хийж хадгална

«Үргэлжлүүлэх →» дараад бодлогуудын дарааллыг (↑ ↓) засна, нэр, төрөл, эхлэх ба дуусах хугацааг тавина.

🏠 Гэрийн даалгавар Дуусах хугацаа хүртэл сурагч хэдэн ч удаа орж гарч, тайван бодно. Хариулт нь автоматаар хадгалагдана. Илгээмэгц оноо, зөв хариу, бодолтоо шууд харна.

📝 Шалгалт Нэг л оролдлого, цаг гүйнэ (минутаа та тавина). Бодлогууд нэг нэгээр гарна. Зөв хариу, дүн нь шалгалтын хугацаа дууссаны дараа л сурагчид харагдана.

Шалгалтад мөн «Дэлгэцээс хэдэн удаа гарахыг зөвшөөрөх вэ» гэдгийг сонгоно (1, 2, 3, 5 удаа эсвэл хязгааргүй — зөвхөн тоолно).

Хадгалсны дараа даалгавар бүр дээр «Сурагчаар туршиж үзэх» товч гарна — сурагчид яг юу харахыг өөрөө нээж үзнэ. Таны туршилт сурагчдын дүнд орохгүй, хэдэн ч удаа дахин туршиж болно.

Сурагчийн эрх. Сурагч тухайн номын идэвхтэй эрхтэй байж л даалгаврыг нээнэ: Дунд ангийн номд — Junior, Ахлах ангийн номд — Ахлах анги, ЭЕШ бэлтгэлд — ЭЕШ-ийн эрх. Хадгалах үед аль эрх хэрэгтэйг хуудас танд сануулна.

Тогтмол бодлого. ЭЕШ-ийн сорилууд, сэдэвчилсэн сорилууд, ЭЕШ 35 жишиг сорил 2-ын бодлого жинхэнэ шалгалтын бодлого тул бүх сурагчид ижил тоотой гарна. Бусад номын бодлого сурагч бүрт өөр тоотой.

Шалгалтын хамгаалалт

Вэб сайт утас, компьютерийг бүрэн цоожилж чадахгүй. Харин сурагч бусад зүйл ашиглахыг илрүүлж, саад учруулж, танд мэдэгдэнэ:

Нэг нэгээр. Дэлгэцэнд зөвхөн нэг бодлого байна — бүгдийг нь нэг дор зураг авч өөр газар асуух боломжгүй. Дээд талын 1 2 3 … товчоор шилжинэ, хариулсан нь ногоон болно.
Бүтэн дэлгэц (компьютер дээр) шалгалт эхлэхэд нээгдэнэ.
Гарахад нуугдана. Өөр апп, таб, цонх руу шилжмэгц бодлогууд бүрэн нуугдана. 2 секундээс удаан гарсан бүр тоологдож танд харагдана.
Автоматаар илгээнэ. Таны тавьсан хязгаараас олон удаа гарвал, эсвэл цаг дуусвал шалгалт хадгалсан хариултаараа автоматаар илгээгдэнэ.
Хуулах, хэвлэхийг хаана. Бодлогын текстийг хуулах, баруун товч, хэвлэх ажиллахгүй.

Хажууд байгаа хоёр дахь утсыг ямар ч вэб сайт илрүүлж чадахгүй — чухал шалгалтыг ангидаа, хянаж байхдаа авах нь хамгийн найдвартай.

4. Шалгалтыг шууд хянах, дүн харах

Даалгавар бүр дээрх 📊 Явц ба дүн товчийг дарна. Хуудас 10 секунд тутам өөрөө шинэчлэгдэнэ — шалгалтын үеэр нээлттэй үлдээгээрэй.

1Эхлээгүй

2Бодож байна

1Илгээсэн

1Одоо гадна

Болд Б. ⚠ Одоо шалгалтын дэлгэц дээр алга · Үлдсэн: 21 мин 🔴 2 удаа гарсан · 37 сек

12 / 20

Сараа С. Сүүлд: дөнгөж сая · Үлдсэн: 21 мин

17 / 20

Тэмүүлэн Т. 20 / 20 бодлого хариулсан

88 / 100

Явц Сурагч бүр хэдэн бодлого хийсэн, сүүлд хэзээ хариулсан, хэдэн минут үлдсэн, хэдэн удаа дэлгэцээс гарсан (🔴). Яг одоо өөр апп дээр байгаа сурагч улаан хүрээтэй хамгийн дээр гарч, буцаж ормогц улаан нь арилна.

Дүнгийн задаргаа Сурагчид илгээмэгц доор нь гарна: бодлого бүрийг ангийн хэдэн хувь нь зөв бодсон, хэн алдсан, хэн хариулаагүй. 50%-иас доош бодлого улаанаар тодорно — самбар дээр тайлбарлах бодлого шууд харагдана. Мөн сурагч × бодлогын хүснэгт (✓ зөв, ✗ буруу, — хариулаагүй, тоо — хэсэгчилсэн оноо).

Excel татах ⬇ Excel татах товч гурван хуудастай файл өгнө: «Дүн» (оноо, хувь, гарсан тоо, хэрхэн дууссан), «Бодлого бүрээр» (сурагч × бодлогын оноо), «Бодлогын шинжилгээ» (зөв %, алдсан сурагчдын нэрс).

5. Сурагч юу харах вэ

«Миний даалгаврууд»

Сурагч нэвтрээд Миний дүн хуудсанд орвол дээд хэсэгт 📋 Миний даалгаврууд товч гарна (хийх даалгавар байвал тоотой). Шууд хаяг: math6000test.mn/daalgavar.html

Бодоод илгээнэ

Даалгавраа нээж бодно. Хариулт бүр автоматаар хадгалагдана — интернэт тасарвал буцаж ороод үргэлжлүүлнэ. Шалгалтын өмнө дүрмийг нь (хугацаа, гарах хязгаар) уншиж байж эхэлнэ.

Дүнгээ харна

Гэрийн даалгаварт — илгээмэгц оноо, зөв хариу, бодолт, урамшуулах стикер. Шалгалтад — «Илгээгдлээ» гэж гараад, дүн нь шалгалтын хугацаа дууссаны дараа гарна.

6. 📝 Хариултын хуудас уншуулах (цаасан сорил)

Ангидаа цаасаар сорил авахад: ЭЕШ загвартай хариултын хуудсыг хэвлэж тараана, сурагчид дугуйлна, та утасныхаа камераар зургийг нь авахад оноо шууд гарна. Сурагчдад бүртгэл, эрх хэрэггүй: цаасаар бөглөсөн хэний ч хуудсыг уншуулна. Хаяг: math6000test.mn/hariult-huudas.html (Багшийн самбар → 📝 Хариултын хуудас уншуулах).

Сурагчдадаа код олгоно (нэг удаа)

«5. 👥 Сурагчид» хэсэгт мөр бүрд нэг сурагч бичнэ: 001 Бат-Эрдэнэ, 10а. Код бичихгүй бол (Номин, 10а) код автоматаар олгогдоно.

Сурагч бүх тестэд нэг кодоо дугуйлна. Ингэснээр түүний бүх дүн нэг дор цуглаж, явц нь харагдана. 🖨 Кодын жагсаалт хэвлэх товчоор жагсаалтыг хэвлээд ангийн самбарт наагаарай.

Тестээ бэлдэнэ

«1. Тест» → ＋ Шинэ тест. Нэр, бодлогын тоо, сонголтын тоо (A–D эсвэл A–E), нөхөх хэсгийн бодлого, үсгийн тоог өөрөө тохируулна. I хэсэг 100 хүртэл бодлоготой байж болно.

Оноо: бүгдэд нэг оноо өгч болно. Эсвэл «Онооны муж» нүдэнд 1-8:1, 9-28:2, 29-36:3 гэж бичээд «Хэрэглэх» дарна. Бодлого бүрийн оноог мөн тус тусад нь засна.

Зөв хариу: «🔑 Зөв хариу» хэсэгт товч дарж оруулна. Хурдан арга: нэг хуудсанд зөв хариуг өөрөө дугуйлаад «Уншуулах» хэсэгт зургийг нь авч 🔑 Зөв хариу болгох дарна. A, B, C, D хувилбартай бол хувилбар бүрт тусад нь оруулна.

Хэвлэнэ

«2. Хэвлэх» хэсэгт нэг A4 цаасанд хэдэн хуудас гаргахаа сонгоно:

1 (A4): бүх төрлийн тест.
2 (A5): цаас 2 дахин хэмнэнэ, мөн бүх төрлийн тест багтана.
4 (A6): зөвхөн сонгох хэсэгтэй, 22 хүртэл бодлоготой богино сорилд.

Хэвлэх цонхонд Pages per sheet = 1, Scale = 100% байх ёстой. 2 эсвэл 4 хувь сонгосон бол тасархай зураасаар хайчилж салгаад тараана.

Сурагчид бөглөнө

Нэр, кодоо дугуйлаад хариугаа харандаа эсвэл хар үзгээр нүдийг бүтэн будна. Хариугаа солих бол хуучнаа сайн арчина.

Утсаараа уншуулна

Утсаараа сайтад нэвтэрч, Багшийн самбар → 📝 Хариултын хуудас уншуулах → тестээ сонгоод «3. 📷 Уншуулах» → 📷 Зураг авах дарахад камер нээгдэнэ.

Хуудсыг ширээн дээр тавиад, 4 буланд байгаа хар дөрвөлжин бүгд зурагт орохоор дээрээс нь авна. Оноо шууд гарна: ногоон нь зөв, улаан нь буруу. Буруу уншсан нүдийг засаад ✓ Хадгалаад дараагийнх дарна.

Дүн, анализ харна

«4. Дүн»: тухайн тестийн дүнгийн хүснэгт ба бодлого бүрийн гүйцэтгэл. Улаан өнгөтэй бодлогыг ангидаа дахин тайлбарлах хэрэгтэй. Excel-ээр татна.

«6. 📈 Анализ»: сурагч бүрийн явцын график (тест бүрийн оноо, ангийн дундажтай харьцуулалт, хэддүгээр байр эзэлсэн), мөн бүх тестийн дунджаар эрэмбэлсэн ангийн жагсаалт. Ангиар шүүж, Excel-ээр татна.

Архив. Тест, дүн, сурагчдын жагсаалт серверт хадгалагдана: утас, компьютер аль алинаас харагдана, утас сольсон ч алга болохгүй. Тестээ компьютер дээр бэлдэж хэвлээд, утсаараа уншуулах нь хамгийн хялбар. Ангид интернэт тасарвал утсандаа хадгалж, интернэт орж ирэхэд өөрөө илгээнэ. Хуудасны дээд хэсэгт ☁ Серверт хадгалагдсан гэж харагдана.

Нууцлал. Зураг сервер рүү явахгүй, утсан дотроо уншигдана. Таны тест, дүнг зөвхөн та л харна.

Сайн уншуулах зөвлөгөө

Гэрэл: цонхны дэргэд эсвэл гэрэлтэй газар авна. Утасныхаа сүүдрийг хуудсан дээр бүү тусга.
4 булан: хар дөрвөлжин бүгд зурагт бүтэн орсон байх ёстой. Хуудас хазгай байсан ч уншина.
Хуудас: нугалж, үрчийлгэж болохгүй. Хэвлэсний дараа тестийн бодлогын тоо, хуудасны хэмжээг бүү өөрчил: хэвлэсэн хуудас уншигдахаа болино.
Шар нүд нь сурагч нэг бодлогод олон нүд будсан гэсэн үг. Зөвийг нь гараар сонгоно.
Утсанд суулгах: iPhone дээр Safari → Хуваалцах (□↑) → «Add to Home Screen». Android дээр Chrome → ⋮ → «Add to Home screen». Ингэснээр апп шиг нэг товчоор нээгдэнэ.

7. Түгээмэл асуултууд

Хариултын хуудас «Булангийн 4 хар дөрвөлжин олдсонгүй» гэж байна Хуудас бүтнээрээ зурагт ороогүй эсвэл хэт харанхуй байна. Арай холоос, гэрэлтэй газар дахин аваарай. 2 эсвэл 4 хувиар хэвлэсэн бол хайчилж салгаад нэг нэгээр нь авна.

Хариултын хуудас уншуулахад сурагчдад эрх хэрэгтэй юу Хэрэггүй. Зөвхөн танд (багшид) аль нэг багцын идэвхтэй эрх байхад хангалттай. Сурагчид бүртгэлгүй, цаасаар бөглөнө.

Сурагч кодыг оруулсан ч жагсаалтад харагдахгүй байна Хуудсаа дахин ачаална (компьютер дээр Ctrl+Shift+R, Mac дээр ⌘+Shift+R). Мөн сурагч зөв кодыг, зөв бүртгэлээрээ оруулсан эсэхийг шалгаарай.

Сурагч жагсаалтад байгаа ч бүх нүд нь цэг байна Тэр сурагч хараахан нэг ч сорил дуусгаагүй байна. Эсвэл өөр номын сорил бодсон байж болно — дээрээс ном, бүлгээ солиод үзээрэй.

Сурагчийн нэрний хажууд «эрхгүй» гэж бичсэн байна Тэр сурагчийн багц идэвхгүй байна. Тэд зөвхөн үнэгүй сорилуудыг л бодож чадна.

Нэг сурагч нэг сорилыг хоёр удаа бодвол аль нь тоологдох вэ Хамгийн сүүлийн оролдлого. Тийм нүд шар хүрээтэй харагдана — хулганаа дээр нь аваачвал хэдэн удаа бодсон, хамгийн сайн дүн нь хэд болох гарч ирнэ.

Бүдэг саарал ном, бүлгүүд юу гэсэн үг вэ Таны ангийн хэн ч тэндээс хараахан сорил бодоогүй гэсэн үг. Дарж болно — даалгавар өгсөн хэрнээ хэн ч эхлээгүй байгааг шалгахад хэрэгтэй.

Сурагч даалгавраа олохгүй байна Сурагч таны ангид кодоор нэгдсэн эсэхийг, мөн даалгаврын эхлэх цаг болсон эсэхийг шалгаарай. Эхлэх цаг болоогүй даалгавар «Удахгүй нээгдэх» хэсэгт саарал харагдана.

Сурагч «эрх хэрэгтэй» гэсэн мэдэгдэл харж байна Даалгаврын бодлогууд аль номынх вэ, тэр номын эрх сурагчид идэвхтэй эсэхийг шалгаарай. Жишээ нь 9-р ангийн бодлогод Junior эрх, ЭЕШ-ийн сорилд ЭЕШ-ийн эрх хэрэгтэй.

Сурагч шалгалтаа дахин өгч болох уу Үгүй — шалгалт ба гэрийн даалгавар хоёулаа нэг л удаа илгээгдэнэ. Дахин өгүүлэх бол «Дахин ашиглах» товчоор ижил бодлоготой шинэ даалгавар үүсгэнэ (сурагч бүр дахиад шинэ тоотой бодлого авна).

Даалгаврыг устгавал юу болох вэ Даалгавар болон түүнд сурагчдын илгээсэн бүх дүн хамт устана, буцаах боломжгүй. Устгахаасаа өмнө хэрэгтэй бол Excel-ээр татаж аваарай.

Сурагч шалгалтын үеэр интернэт тасарвал Хариултууд нь хадгалагдсан байгаа. Буцаж ороход зогссон газраасаа үргэлжилнэ. Цаг нь сервер дээр явдаг тул тасарсан хугацаанд ч цаг гүйнэ.

Багц маань дуусвал ангиуд минь устах уу Үгүй. Ангиуд, сурагчид бүгд хэвээрээ хадгалагдана. Эрхээ сунгамагц бүх зүйл байрандаа эргэж ирэх бөгөөд сурагчид дахин код оруулах шаардлагагүй.

Утсаар ажиллах уу Тийм. Хүснэгт өргөн тул утсан дээр хажуу тийш нь гүйлгэж харна. Сурагчдын нэр зүүн талд тогтмол харагдсаар байна.

Багшийн эрх авах, асуулт тавих
Бүртгүүлсэн и-мэйл хаягаа дараах хаягуудын аль нэгээр илгээнэ үү:

Фэйсбүүк хуудас math6000saraa@gmail.com

Багшийн самбарт юу нэмэхийг хүсэж байгаагаа ч бас хэлээрэй — багш нарын саналыг сонсож хөгжүүлж байна.

→ Багшийн самбар руу орох · → Даалгавар ба шалгалт